Mundèll

Mundèll

Vìscura l’è la fiama e la cüsìna

la sa, dasìn-dasìn, dul bonn udùur

dra stagiùn ca l’è fung e nebiulìna,

prìmm frècc e ‘na gran prèssa a vegni scüür.

 

Bòfa la fiama e crèss dent la padèla

la voja da saltà di me castègn,

catà sü mia luntan du la Capèla

ca regorda ‘l Signùur sura ‘l So legn.

 

Bòfa la fiama e ridan i castègn,

ul taj sa slarga e par un gran suris.

Vüna la sciòpa e n’altra mo la vegn,

pizìga ‘l föögh. Che bell, l’è ‘n paradìs!

 

Autùn, i tò säùr in chi in la cà,

dent ‘na padèla, ul fa di me castègn.

Un vinell dulz giamò l’è preparà,

vùsan i fiö: “Hinn prunt i to castègn?”

 

“Ga sèmm, ga sèmm, mo sagi, sti un pù quiètt.”

Dabùn in cott, scutènt e muresèll.

Segn du la crùuz, pö ‘l tàca ul me Carlètt:

la büscia la so vöja da mundèll.

25 ottobre 2010

 

Mondelle

Vispa è la fiamma e la cucina

sa, adagio adagio, del buon odore

della stagione che è funghi e nebbiolina,

primo freddo e una gran fretta ad imbrunire.

 

Soffia la fiamma e cresce dentro la padella

la voglia di saltare delle mie castagne,

raccolte non lontano dalla Cappella

che ricorda il Signore sopra il Suo legno.

 

Soffia la fiamma e ridono le castagne,

il taglio si allarga e pare un gran sorriso:

una scoppia e un’altra adesso arriva,

pizzica il fuoco. Che bello, è un paradiso!

 

Autunno, i tuoi sapori sono qui in casa,

dentro una padella, il sapore delle mie castagne.

Un vinello dolce è già preparato,

urlano i ragazzi: “Sono pronte le tue castagne?”

 

“Ci siamo, ci siamo, adesso le assaggio, state un po’ quieti.”

Davvero sono cotte, infuocate e morbidine.

Segno della croce, poi inizia il mio Carletto:

frizza la sua voglia di mondelle.