Il discorso del Re

                                        ph carlozanzi

Donn e tusann, oman e fiö, gent da Varées

dul lagh, dra muntagna, dul centro e di paes:

Busìtt, va salüdi! Sii vegnüü propri in tanti

dai sìit chi visìn e da quei püssée distant.

L'è bell quell da good 'l carneval in cumpagnìa,

donn, oman, inscì: tücc viscur e in alegrìa.

Un divertimént inscì 'l léva via da doss

i crüzzi e i fastìdi, ànca quéi püssee gross.

L'è stai 'n gran spetàcul a girà par i stràa

pién da bèla gent, fiö piscinitt mascuràa.

Caruzzùni, müsica, balerìn, burdèll

pa'l vost Re Busin gh'è nagott da püssée bèll.

Manca propri niènt, podi dill propri da bùn!

Dal mumént ca pàrlum di nòstar tradiziùn

vöri dì la mia, senza tropp pregiudìzzi

e segund l'üsanza, di facc dul Municìpi.

Dopu vutaziùn e balutàgg, l'ann passàa,

l'aucàtt Galimberti vincidür (l'è) risultàa.

E inscì l'è süccèss che dopu vintitrìi ann

l'ha perdùu ul partìi du l'Alberto da Giussan.

Mi sun Re e par mi gh'è dumà la munarchia,

mi capissi pocch di robb dra demucrazia,

ma parchè la gent, quand sa tratta da vutà,

va par dì la sua pocch püssée dra metà?

Dèss inscàmbi tücc sa specian gran cambiament:

dopu men d'un ann, sa po mia da cert parténd!

Saress 'mè in dul sport, quand cambien alenadùur,

che anca i bròcch diventen, da sübit, di campiùn.

Parlém mia da sport, dul fotball e quéi robb lì,

'chè 'l Varées a'l giüga dumà in serie Dì;

e chè quei dul basket, anbén in serie A,

portan nanca adré i sciavàtt a quei di ann passàa.

S'eri 'drée a discütt dra nostra “ròba püblica”:

vegn in ment da sübit ra piazza Repubblica.

Giügh di bòcc, teàtar, bibliutéca e marcàa

al camp di cènt pèrticch sémm sèmpar a turnàa.

I disègn hin tanti, i danée hin sèmpar pocch,

sperém da fa mia i robb un tant al tòcch!

Gh'è da cuntentass: hann metüü 'sta pruibiziùn:

sa pò no fa sciàmbula, béev, fà culaziùn!

Par quatà i brütéz di müür ch'hinn 'drée a crudà

gh'è 'n'iniziatìva che 'n port la po andà;

se i danée 'n quaivün i tìra fö dul burzìn

sa métt 'n gran diségn tacàa sü 'l baltruschìn.

In la cà dul Pinocchio sa pudéva truvà

fögh e caminétt süra 'n müür pitüràa,

vuréss mia 'l ciél che (d'ra) bibliotéca o àlter

restàss sulamént 'l diségn e nagott d'àlter.

L'è 'drée andà a tocch financa 'l gran Bernascun!

Hann metüü 'na réet, parchè sia da pruteziùn.

Ul nost campanin l'è, du la cità, l'unùur

saréss un pecàa fà 'n tort al nòst prutetùr

Già ca semm adré a discütt di nostar robb bell

spendi 'na paròla sul gluriùus Grand Hotel.

Hin stai a fa 'n film, un “remake” d'un hòrror vécc

l'oròr dabun l'è lassà sü i antènn sul técc.

I rogn sempar prunt, l'è mia 'l càas da fà manfrina,

hin finìi da mèzz fìna i vegìtt dul Molina!

Mi pensi dabùn, vöri no fà 'na critica,

l'è mia propri 'l càas: mis'cià cüür e politica.

Saress da parlà da manütenziùn di stràa,

du la sicürezza da nocc par la cità.

Varées l'è inscì bèla, ghe manca dumà pocch,

e la qualità dra vita saress mei 'n tocch.

Ho parlàa anca tropp, mo va lassi in cumpagnia:

di amiis, vost da cà... e par finì in alegria,

mi va racumandi: un bun bicer da vin,

par fa tücc cin-cin … insema al vòst

Re Busin